السبت، 21 أبريل، 2012

فيفي و طقم الصيني


[ فيفي و طقم الصيني ]

فيفي عروسة حلوة قصدي بنوتة .. هما بيقولوا عروسة ! .. بس الكتاب بيقول بنوتة
المهم
جت في يوم من الايام مامتها قالتلها :
جه اليوم اللي لازم افهمك فيه ايه هي خطتك الجاية في الحياة بعد ماتخرجتي وبقيتي عروسة ,,
و اعرفك السر الخطير اللي خبيناه عليكي طول العشرين سنة اللي فاتو علشان كنتي صغيرة

احنا لازم يا بنتي نجيبلك طقم الصيني !! لأنك لازم تتجوزي !!

" مش لسة بدري يا ماما ؟! ,, مش وقته "
" ازاي يا بنتي ,, احنا نعرف أكتر منك ,, مفيش بنت من غير طقم صيني ! ,, ربنا يهديكي خلينا نجيبه "
ابتدت تتنح ,, لما عرفت انها داخلة على أيام مالهاش ملامح !

و نزلت فعلاً و فضلت تلف هنا و هنا ,, و كل أصحاب المحلات بابتسامة عريضة صفراء او خضراء مش فاكرة .. " اتفضلي يا عروسة "
يا ناس انا مش عروسة لسة .. !!

و اتكتب على وشها عروسة لمجرد انها رايحة تشتري طبقين !! يلا فال كويس .. الكلمة المريضة اللي بتتسمع
يلا

و كانت فيفي محتارة و فضلت تتخيل شكل العريس المبجل .. هيبقى لونه ايه علشان تجيب الأطباق لايقة عليه .. ما هو اللي هياكل معاها !!
و فين و فين على ما استقرت على لون محدد .. و اهو تبقى تنقي واحد بقا بيحب اللون دا .. و يعجبه .. و ربنا يستر و يقتنع بيه ..
ما أصل الموضة بتاعت زمان .. الأطباق الاول بعدين العريس !! هو لما يلاقي اللون عاجبه هيكتب الكتاب على طول :)

و اشترت أحلى طقم صيني في المحل ..

المشهد التاني :
في أوضة فيفي ..
و هي بتدور على مكان تحط فيه طقم الصيني الجديد .. و بشويش اوي تخلي حد يشيله ينقله من هنا لهنا .. و من هنا لهنا .. و براحة .. و خللي بالك .. دا بكذا !!
و مافيش حد في البيت و برة البيت الا لما شاله .. لحد ما ييجي حد يشيله هو و صاحبته !

و فضل طقم الصيني ينتقل من جمب المكتب لحد عند السرير و من جمب السرير لتحت المكتب و على جمب و عند الباب ... فضل يتمرمط و يتشال و يتحط على مدار 3 سنين !!
أيون .. 3 سنين .. لما عجز و شعره شاب و كرمش و بقا قاعد يشتم فيها طول الوقت ,, خلصينا بقا من البهدلة دي !!

و كل اللي أخدناه من طقم الصيني انه عامل زحمة و مش لاقينله مكان في اوضة فيفي ..
ما هو أصلاً مكانه مش هنا !!
ايه اللي جابه بدري طيب .. ؟ مش كان يستنى دوره و ييجي في وقته .. !!
و تيجي النتيجة كدا حاجة من اتنين .. يا هيجراله حاجة ينتحر مثلاً من المرمطة اللي فيها و يرتاح و يريّح الجميع من الشيل ..
أو انها في الوقت المناسب هتجيب واحد تاني خالص بعد ما تكون زهقت من وش دا :)

و يبقى السؤال ..
ايه سر اصرار الأمهات على تجهيز بيت واحد لسة مش موجود أصلاً ؟!

© هدى علآم
..