متمرده علي أمسي

تعانقت حروفي معا لاول مره
تاركه اعماقي وحيده
حامله مظله من اسرار
هاربه من مجهول...

فقد اعلنت اجنحتي الطيران !


لتلامس صفحات حياتي القادمه
بكتابات ورديه
حرف من امل وحرف من حياه
تنطلق من خلالها اعاصير من الاحاسيس المنتدفقه تعصف بي لعالم اخر

تناثر حبرها الوردي وانبت بجانب الحروف زهورا
تحمل بين اوراقها اجمل الاحلام
تتطلع للاعلي لتلتقط قطرات الندي فتوهبها حياه جديده .....

تراقصت عاشقه للمنظر
وشاركتني حبات المطر
بعد ان تركتها السماء
تعلن لي سمفونيه جديده تحمل من الاحلام احــلام

يالروعه المنظر
حلقت عيناي
وحلقت
لابعد مايكون

وحدثت نفسي نفسي
اتركي الحزن يمضي حيث يمضي
وابدلي صفحاتك باللون الوردي
وانجبي من حاضرك عمرا ابدي

وانطلقي حيث تتالق النجوم
ويحلق القمر لاجل العشاق
وترتسم الورود تزين المسارات
ويمر جدول من الامل عبر الاثير
لتحتمي الحياه خلف .. الحب ..


لامستني حبه مطر
من نعومتها ورقتها
عشقت حياتي من جديد

نظرت لي نظره خاطفه
وهمست
" متمرده انتي "

عايزين قانون طواريء لجنينه الحيوانات :(

عايزين قانون طواريء لجنينه الحيوانات

هكتبها علي يافته وهمشي بيها في الشارع .. علشان دا حقي الدستوري في بلدي ..
انا عايزه قانون طواريء !
علشان :
لما رحت اتفسح زيي زي خلق ربنا ورحت جنينه الحيوانات .. العب مع البجع اللي بحبه
فوجئت بعاصفه جايه تنكد عليا وتقفلي اليوم ..
مين ؟؟..
واحده ست .. بيقولوا يعني انها واحده ست .. !! .. واخده 3\4 الشارع وواقفه قدام بوابه الجنينه وعلي جثتها حد يركن عربيته هنا .. مش هنا يعني قدامها .. لا هنا بتاعها دا يعني حواليها بحوالي 6 متر من كل اتجاه
بحيث اننا نركن العربيه في البيت ونيجي مشي احسن !! علشان نفسها مايتخنقش !!

( الست ) ولو اني مش مقتنعه .. مجرد ما شافتنا بنركن .. بصوتها اللي بسم الله ما شاء الله .. " مفيش حد هيركن هنا .. اركن صف تاني قدام "
مين دي ؟؟
حضرتك ظابط مرور ؟؟ .. ولا نادورجي واقف قدام الجنينه ..
طبعا انا افتكرتها بتكلم حد تاني
" انت يا عم .. بقولك اركن صف تاني قدام كدا هتقفل المدخل "
طبعا عربيتنا الغلبانه هي اللي هتقفل المدخل .. وفدانين الشيبسي المحطوطين دول مش عاملين حاجه !!

طبعا واضح جدا انها عصبيه ومعندهاش صبر .. لان بابا مجرد ما قالها ان ماما مش هتقدر تمشي لو ركنا بعيد .. وهي صوتها كان اللي قاعد في بلاكونته في المهندسين سامعها
ومش بس كدا .. شتيمه بقا من كل صنف ولون ..
طبعا انا كل دا قاعده جوه العربيه علشان المفروض ان انا بنت ناس وعيب لما اقل ادبي :).. والبنات الشطار بيسمعوا كلام ماما وبابا ويقعدوا في العربيه
سمعت كدا من بره الباب ( وانا جوه ) .. " انت اصلكوا ............... ( علشان الرقابه بس ) ..
الشتيمه دي كانت لبابايا ومامتي = ) .. وسمعوني زغروته بقا ..
اكيد اكيد انا مش تلاجه .. طبعا خرجتلها ..
وكل اللي قلته انتي مين انتي علشان تتكلمي معانا كدا ؟؟ ( يخربيت الادب اللي انا فيه ) .. فيه قانون يمنعك تقفي كدا الغلط مش علينا ومش هنركن صف تاني .. ( طبعا مش هقدر اقول ردت عليا قالت ايه بس علشان كلمه قانون دي )
وواثقه من نفسها اوي جدا خالص يعني ..

وشويه وخرج كائن حي من المحل ( يقال وعلي حسب معلوماتي يعني انها ست بردو ) !!
سيجاره وترحه سودا وصوت مسمعتوش قبل كدا .. ودي بقا مابتتكلمش وتشتم وكدا .. دي بتتعامل بايديها .. يعني اذا كان دول ايدين مش حاجه تانيه
وكانت هتمد ايديها عليا .. .. وقالتلي انتي مش متربيه :(
انا مش متربيه ؟؟ ..

هي عمرها ما بصت في المرايا ولا شافت نفسها بتتعامل ازاي ؟؟
مين اداها الحق تشتم وتبهدل في الناس كدا ؟؟
مين اللي اداها الحق انها تتصرف في كام متر من شارع الحكومه وتمنع الناس تمشي وتقف ..
وليه انا مش قادره اخد حقي وكرامتي اللي اتبهدلت في الشارع واتلم عليا الناس
ليه ؟ علشان مؤدبة ؟ .. علشان بنت ناس ؟ .. ايه علشان عيب ؟؟
اه عيب ..
وهو مش عيب اللي بيحصل فينا
مش عيب الغابه اللي احنا عايشين فيها ..
جنينه الحيوانات مش في الكام الكيلومتر اللي في الجيزه ..
جنينه الحيوانات خرجت للشارع ..
كله بقا بيتعامل مع بعضه زي الحيوانات .. مابيتكلموش ومابيتفاهموش يمدوا ايديهم .. ولو حاولت تدافع عن نفسك .. يا هتموت يا هتعيش بعاهه مستديمه .. ولو ربنا وفّقك واخدت حقك هتقضي اللي باقي من عمرك بحقك في السجن مع المجرمين ..
ماهي بلطجه ..
عايزين قانون جديد يمنع المهزله .. ويرجع الناس بنيادمين ..
عايزه اتكلم مع بشر .. ناس بتتعامل بعقلها مش بايديها وبالسكاكين ..
انا لسه بنيادمه ماتحولتش ومن حقي الاقي ناس زيي اتفاهم معاها ..
احسن كدا .. يا هتعدي من مرضهم دا واضيع .. يا هروح بلاش انا وغيري ..
والشارع كله هيبقي جنينه حيوانات كبيره :(

أشباه رجال

انكتبله عمر جديد اللي ربنا انقذه من بنوته مثقفه وبتفهم =)
ماهو لما ييجي واحد يتكلم - علي انه - راجل .. وهو مازال طفل بيبي صغنن مش بيعرف يتصرف .. يبقي عيب .. وخطر عليه من البنات .. دا ممكن بنوته تفطسه خالص وتخلص عليه .. وهو لسه صغير يا حرام

الراجل ..
يعني علي حسب مفهومي انا للرجوله .. يعني واحد اولا معتمد علي نفسه .. وثانيا ينفع يُعْتَمَد عليه ..
خلينا في الاولي
يعتمد علي نفسه يا حلوين .. يعني ببساطه كدا مثلا يكون بيشتغل بيصرف علي نفسه دا ماديا .. معنويا بقا .. انه يعرف ياخد قرار .. يعرف يتصرف في مشكله .. يعرف يخطط لنفسه حياته .. يكون مر بمواقف فيبقي عنده رصيد خبره .. مايبقاش فاضي من جوه
طبعا لو حاجه واحده ناقصه من دول .. مش هنعرف نروح لثانيا !!

ثانياا .. يُعْتَمَد عليه
علشان ان شاء الله لما يكبر ويبقي عريس حلو =) .. ويلاقي عروسه حلوا بردو .. ويفكر لا قدر الله انه يتجوز ويقرفنا .. ينفع يتجوز !! .. ويكوّن اسره وبيت جديد .. وحياه !!
لان لو واحد مش بيعرف ياخد قرار صح .. البنت هتعمل بيه ايه !!
لو هو يا عيني مش بيعرف يحل اول مشكله تقابله في علاقته مع بنوته .. هي المسكينه تعمل ايه :(
ولو اتورط في خطوبه يا حرام .. هيعرف يكمل ولا هيغرق ويغرقنا معاه .. ويحرق دمنا ويعصبنا .. ونضطر بقا ندور علي سكاكين واكياس بلاستيك ونتعب نفسنا .. علشان نخلص منه ونريح نفسنا وغيرنا من بعدينا ( معشر البنات يعني )

الراجل اللي يُعْتَمَد عليه دا ( الله يرحمهم جميعا )
المفروض .. يبقي عارف مبدأيا يعني ايه " مسئوليه " .. ان شا الله يكون سمعها في نشره الاخبار .. بس يكون يعرف عنها حاجه :( ..
وبلاش الله يخليكوا .. " اصل ماما مش هترضي !! " علشان شكلكوا بيبقي فاضلّه مصاصه !!

جرب تعتمد علي نفسك كدا يمكن تنفع .. محدش عارف .. =) .. حاول ويكفيك شرف المحاوله .. بحيث اننا يبقي عندما امل .. علشان الضغط وكدا واحنا لسه صغيرين

نيجي لموضوع تاني بيضايقني جداااا
الحوارات والحجج !..
الواحده علي ما تلاقي اللي بتدور عليه ... تكون مرّت بكل ما لذ وطاب من الحوارات
مش هقدر اتجوز دلوقتي .. اصل بنت عمي بتبصلي .. انا بطني بتوجعني فمش هقدر اكمل معاكي .. حلمت امبارح حلم وحش بيكي وماما قالتلي دي شؤم !!
او يكون مؤمن ( ربنا يزيده ) .. الطيبون للطيبات وانتي طيبه .. او يقولك كل شيء نصيب .. اااه :)

وكل دا مايقولهالكيش في وشك .. لأ .. يبعتهالك بالحمام الزاجل .. طبعا علشان مايجرحش مشاعيرك :) .. اكيد علشان ما يجرحش مشاعيرك
مش جبان ولا حاجه .. " ان بعض الظن اثم "

الغلابه المثقفات ..
اللي زيي ^ ^ .. احب ابشركوا وافرحكوا بانكم .. مش هتتجوزا .. اه =)
لان للاسف كل ما البنت بتعلي بثقافتها او شخصيتها او تعليمها .. بتبقي محتاجه راجل .. يحتويها ويحميها ويساعدها تكون احسن .. راجل فاهم دارس عارف بيعمل ايه ..
يحترمها ويحترم عقلها .. ويقويها ويشجعها .. ويخليها حاجه حلوا هو نفسه هيبقي فخور بيها ..
طبعا انا بتكلم عن ( رجال )
بمعني الكلمه يعني
انما اللي موجود حاليا في الاسواق
( أشباه رجال )
شكله شكل راجل يعني لابس قميص وبنطلون .. بيتكلم زي الراجل .. بيتعامل زي الراجل .. بيدفعلها فلوس المواصلات :) ..
بيروح يطلبها للجواز .. بردو زي الراجل .. بس يخطف ويجري =)
بمعني :
انا عايز اتجوزك .. طب اديني فرصه افكر
لا انا مش بتاع حوارات انا هاجي اخطبك .. لازم تعرفي اهلك انا بحب النور انا .. انا .. انا .. وفجاه ..
النور يقطع خالص ..
ومحدش عارف مين عمل ايه
المهم ان المعلم بيجري .. طب ليه .. يهرب بقا .. يخاف .. يطنش .. مش مهم .. المهم المعني ..
انه مش اد المسئوليه .. انه مش جد .. او مش فاهم ..
مش عارف حجم الجرح اللي بيسببه لانثي .. ومش حاسس انه ممكن يهد او ممكن يبني حاجه حلوا
قبل ما تفصل قيس .. ولو مش اد الكلمه ماتقولهاش لو سمحت ..
ولو مش اد انك راجل .. ياريت مانسمعش صوتك .. وياريت بجد ماتتعاملش معانا وماتتصرفش لوحدك .. واحسنلك ماتخرجش من بيتكوا
دماغنا بقا
المجتمع مش ناقص فشل .. ومش ناقصين احباط ..
واحنا تعبنا :(
( معشر البنات يعني )
واتقوا الله فينا .. احسنلكوا 

مفيش سلامو عليكوا 

:(

معتصمه !!

" معتصمه" .. هي جت عليا ؟

انا عامله اعتصام .. لحد ماتتحقق مطالبي
وهعمل اضراب كمان .. انا حره .. من حقي اعبر عن رأيي .. ومن حقي اطالب بحقوقي واستني تتحققلي ..
هعمل اضراب
بس انا مش هعمل اضراب عن العمل .. انا هعمل اضراب عن الكلام ... ايـــون .. مش هتكلم لحد ما يحصل اللي نفسي فيه
هشتغل وانا ساكته شويه
لو حد قاللي رأيك ايه .. هخرس خالص ..
ولو حد قاللي تعالي مظاهره مش هرد عليه ..
لو حد قاللي قولي لأ هقولله .. لأ لأ لأ .. منا كان نفسي فيها وقولتها خلاص :)
هاخد بريك شويه .. وافكر اشوف المفروض هعمل ايه بعد كدا
هجرب احط خطه لحياتي اللي جايه .. بعد ما اخدنا الحريه .. يمكن الخطه تنجح المره دي
واقعد احلم بشويه احلام من اللي كنت بحلمها قبل الثوره ..
افكر في كل الحاجات اللي حصلت مش متوقعه .. والحاجات اللي كنت نفسي فيها وحصلت واشوف نتائجها .. جت زي مانا عايزه ولا لأ .. !
بريـــــــــــك بقا تعبنا ..
او تعبت .. انا لوحدي يعني خليني في حالي احسن حد يزعل :)
انا تعبت
تعبت من كل شويه عايزين عايزين عايزين .. ماتركزوا علي حاجه حاجه خللي حاجه تحصل
فكروا انكوا لو عايزين لازم تشتغلوا اولاَ
اللي عايز حاجه بيحارب علشانها .. مش بيقعد في الشارع ويسيب اكل عيشه .. ويلبس الفشل لغيره !!
نركز نشوف عايزين ايه وهيحصل ازاي .. ايه المطلوب علشان احلامنا تتحقق ..
مطلوب نظام .. هدوء .. تركيز .. خطه محكمه .. ونمشي عليها .. ونكون ايد واحده ..
وهتتحقق مطالبنا .. والله العظيم هتتحقق ..
دا آخر كلام ليا
انا رايحه اعتصم .. ومش هرجع الا لما الناس ترجع ايد واحده .. زي ماكانوا بيحموا بعض من البلطجيه .. وزي ما اتحدوا ضد الفساد ..
مش هرجع .. الا لما الاقي المصريين مصريين .. مش قبائل متفرقه ..
وحشتيني يا مصر :(

نصابين ولكن !!

 

 

 

نصابين ولكن !!

موضه وطفحت علينا .. بجانب اللسان الطويل وقله الادب اللي بقينا نشوفها .. كمان بقينا نصابين ..
وعلنـــاَ َ
فرحانه من قلبي بيكوا والله =)
كل واحد عامل فيها ناصح .. وجاي يضحك علي اللي جمبه .. يفندم دي بضاعه اكسترا .. دي مابتبوظش بتعيش 120 سنه وادي الضمان .. علي ماتروّح تنفجر في وشك
ويقولك .. آسف .. سوء استعمال !!

الي شغالين طياري .. " انا عايز منك كذا .. بس دا بيزنس .. يعني مافيش مجاملات الشغل شغل " .. يا سلام هو حد يكره كدا يعني :) .. بس يا عيني ماتلحقش تتهنى بفرحتك .. تلاقيه نصب عليك النصبايه التمام
وخلاص يا معلم مفيش ليك اي حق .. ولا دليل .. فين اللي اتفقنا عليه .. ايه هو احنا مش معرفه :) .. ايه هو احنا اتفقنا علي حاجه اصلاَ ؟ .. يا عم عيب عليك وانا اللي كنت فاكرك بتعملهالي لله .. روح خللي ربنا يباركلك ..
يعني هو انا شغاله علي بنك .. ولا بصرف من مغاره علي بابا .. منا ورايا مصاريف ومشاغل وعايزه فلوس .. هشتغل لكل معارفي لله وللوطن .. طب اشحت بقا علشان خاطر حضرتك :))) .. بس يارب تنفعني اصلاَ
وماجيش اطلب منك حاجه تبيعني هدومي !!

واحد بقا يعمل فيها ناصح .. ويقولك حسابنا كذا .. وياخد منك شغلك .. وتيجي ساعه الحساب .. " بص اصل الشغل مش زي مانا كنت متخيله .. انا بصراحه متوقعتش كدا بس معلش .. هديك نص الي اتفقنا عليه "
ايوا المفروض اصلا الواحد يحلل شخصيه اللي قدامه ويتخيل هو عايز ايه بالظبط
لا و كانه مثلا يعني بيديك من مصروف بيتهم .. او من اكلته .. دا حقي علي فكرا !! .. لا لا انت حقك زي مانا شايف !! ..

ولما تيجي تواجه او تعاتب يكون الرد ايه .. " دي تجاره والتجاره شطاره .. وربنا حلل التجاره " لا مانلعبش في الحلال والحرام علشان كدا مدتك هتطول في جهنم :)
ثم التجاره الحلال اللي بتكون .. ( بـــ التراضي ) .. يعني لازم اكون راضيه عنك =) .. وطبعا انا مش مسامحاك فـــ مبروك عليك الاقامه في جهنم = )

بالنسبه بقا للجماعه اللي شايفين ان اللي بيضحك عليهم او بيتنصب عليهم دول طيبين وعبط .. فــ اسمحولي
العبيط هو اللي يحلل لنفسه حاجه مش بتاعته - مؤقتا - لانها مش دايمه والحرام عمره ما بيأكل عيش ..
العبيط هو اللي فاكر انه ناصح وبيضحك علي دا وعلي دا ومش عارف ان التاني سايبه بمزاجه علشان يشوفه في الاخر هيعمل ايه وييتفرج عليه وهو ندمان وخسران لانه عايشها بفهوله ..
كل دا طبعا اذا سابلك حقه .. ومجاش بمطوه وعملك خريطه في وشك تلازمك طول عمرك او تيجي فيك رصاصه من اللي بنسمع صوتهم يوميا في كل خناقه :)
ودا كلــــه غير .. عقاب ربنا .. فـــ الف مبروك مره تانيه .. =)

مش معني ان النصاب - اللي متنكر ولابس بدله شيك - ومش لابس مخطط زي الحرامي دا .. انه مش حرامي ؟؟ .. لا دا حرامي .. وعلي كبير اوي .. ع الاقل الحرامي العادي الغلبان اللي بيسرق علشان ياكل دا .. بتكون كل حياته غلط في غلط ورد سجون ومش متربي _ ودا طبعا مش مبرر بس يعني - مش متهني ومبسوط ومتظقطط وعايش حياته 24 قيراط وعمال يسرق من الناس .. !! دا ماعرفلوش مبرر
وعقابه نفس العقاب الحرامي بل وأشد
انا بحذر الجميع من الفيرس دا لانه انتشر وكتر اوي بصراحه .. كدب وخداع وفهلوه وفاكرينها نصاحه .. ياريت ناخد بالنا يا جماعه من صحتنا .. الكدب خطر خطر خطر .. واخرته وحشه .. وبلاش عباءه اللطافه اللي بتتلبس دي
بقت باينه اوي .. وشكل النصب بقا بيبان من تحتيها = ) .. شكلكوا وحش ..

وبس خلاص
اقعدوا بالعافيه
وحسبي الله ونعم الوكيل

عيد سعيد

يا شمعه في عيد ميلادها ..
الليلادي
ضحكيها
الساعه دي فرحيها
شامعه زايده
وحلم ابيض
دنيا حلوا جديده ليها
فرحيها
بالاماني غرقيها
والسعاده متعيها
اوعي بعد الليله ديا
اوعي تاني تزعليها .. !
خللي ليله عيد ميلادها
احلي ليله وفرفشيها
عيد ميلادك احلي عيد
شمعه زايده ويوم سعيد
نضحك
نفرح
نحلم
ليكي
كل يوم .. يوم سعيد :)

بنبونايه

 

 

بنوتايه
مسكرايه
زي البنبونايه
من بنبونيره
لـــ بنبونيره
ولسه بردو مفيش حكايه
توبها وردي فوشيا
ورده حمره مغلفاها
أمتي حلم جميل وأبيض
تلبسه تحقق مناها
وسلوفانايه
محنياها
ضحكه حلوه
جايه ليها
فص أبيض
زينه حلوا مزيناها
ورد مفروش حواليها
وسمعونا زغروتايه
وابتسامه وفرحه حلوه
تكون خلاص أسعد نهايه
♥