جواب لحبيبي اللي ماعرفوش :)

حبيبي ..
انا مستنياك اسرقك .. من دنيتي ومن دنيتك .. واخطفك .. جوه قلبي .. واحبسك .. مانت وحشتني وغبت عني .. هو انا مش بوحشك ؟

حبيبي ..
كتبتلك .. لاني بجد اشتقتلك .. اكلمك وتكلمني .. صحيح انت لسه ما قابلتني .. بس حاسه انك عارفني .. مستنيني زي ما بستناك !

كتبتلك .. علشان اقولك .. اني محضرالك .. دنيتي واخرتي .. تشاركني فيهم .. وتساعدني .. المس احلامي اللي نفسي فيها .. ومش هوصلها غير بيك ..

كتبتلك .. ونفسي يوصلك احساسي اللي تاعبني .. وتقربلي .. وتجيني .. تاخد وتدي .. وتسعدلي ايامي وحياتي .. وتسرقني زي ما انا هسرقك :)

بكتبلك وبطمنك عليا .. اني لسه عند وعدي معاك .. واني مستنياك .. واني عاهدت ربنا اني هعيش علشان رضاك .. مانت نصيبي ..
بطمنك اني كويسه وبخير .. وبحاول ابقي حاجه حلوا تتشرف بيها .. وتكون فرحان لما تشوفني .. وتتبسط مني ..

حبيبي اللي ماعرفوش ... :
بص بقا .. ماعرفش هشوفك ازاي وامتي .. ولا حتي فين .. ومش عارفه هكلمك وهعرفك ازاي ؟ ..
فـــ علشان اعرفك .. هطلب منك حاجه .. مش هقولك حط وردا حمرا .. لا ..
هقوللك خليك مؤدب في علاقاتك .. وراعي ربنا في تصرفاتك .. لا تبص هنا ولا هنا .. علشان ربنا يباركلي فيك .. وخليك قريب من ربنا .. علشان يقربني ليك .. واحمده علي كل شيء .. علشان يديك ويرضيك ..

آه .. ومتنساش رضا والديك ..
كدا انا هعرفك لما اقابلك .. وهحس بيك .. :)

حبيبي اللي ماعرفوش .. ماتستعجلش وتدور عليا .. انا هقابلك من غير معاد .. ولحد ما اشوفك خللي بالك من حالك .. وادعي ربنا يوفقني ليك ..


زوجتك المستقبليه .. :)

حدوته صغنطوته

بنوته صغطوته
كانت حياتها حدوته
قطقوطه .. حلوا زي البسكوته
حلمت زي البنات
تجري وتلعب .. وبالذات ..
حلمت تبقي اميره .. واجمل من كل الملكات

وتروح لأمير زيها
وتعيش معاه حبها
تضحك وياه بقلبها
وتنسي الهم والساعات ..

وجه اميرها .. وحبها
بايديه الاتنين شدها
لدنيا تانيه .. وقتها
كان زي الملاك .. !

خطفها علي حصان ابيض
وتحت جناحه خباها
يدفيها .. وعنيها تغمض
وتبعد عن دنيا مش عايزاها ..
كان من الدنيا يحميها
ويبعد عنها ايامها

تروح وياه لعالم
فوق بعيد في السما
تطير تحلم تشوف
اللي عمرها ما هتفهما

لفت ولفت ولفت
وكانت اسعد ايامها ..

..... !
وفجأه شاء القدر
انها تقابل المطر
يبلل جناحيه اللي طايرين
بيها وسط البحر ..

خافت البنوته
.. وحست بالخطر
خبت عيونها جواه
تحت جناحه الكبير ..
اشتد المطر بقوه
وكسر قلبها الصغير ..
ماقدرش يحملها
اصل المطر عليه شديد
اتمسك بيها اكتر
ماهي من غيره .. تضيـــــع

دموعها اختلطت بالمطر
وهو مش حاسس بيها
ماهو مش فاهم دا ايه .. دمع ولا مطر ..

لكن النتيجه كانت
انه .. اعتــــــذر .. !
قال انه ما يقدر علي الخطر ..


من صدمتها تاهت
في لحظه ماتمنيتها
قالت يارب انجدني .. ونزلت وسابت دنيتها ..

وقعت
وتركت وراها
احلي سما .. واحلي راحه

نزلت علي ارض صلبه .. بس كانت لسه عايشه
لكن للاسف .. كان كل شيء
انكســـــــــر !
ومبلول من المطر .. .. ..

احست انها بدونه لا شيء
تراجعت بضع خطوات ..شعرت بالخوف يتملكها .. توقفت مكانها
خائفه .. حائره .. متردده .. اتسير .. تكمل ما ابتدأته .. ام ترجع وكأن شيئا لم يكن !
حين احاطها الظلام من كل جانب .. يهمس لها .. ارجعي ..
التفتت ونظرت للخلف .. فرأت انها تمكنت من سير اكثر من نصف الطريق ..
فمن الجبن حقا ان تتراجع وقد اقتربت من النهايه ..
تملكت منها الذكريات .. واعادت لها الامل في صور
صور من الامان والراحه والسعاده .. المتواجده مع وجوده في ايامها ..
فجاه وبعد الخوف والتردد اقسمت الا تعود
اقسمت ان تكمل الطريق
اقسمت ان تتعدي كل الظلمات والخوف لتصل الي ماتتمناه ..
شحنتها العزيمه بعد ان رأت زهره بيضاء بريئه .. مبلله من الامطار علي ارض الطريق المظلم .. رساله من القدر بأن كل شيء يمكن ان يعيش لفتره اطول باراده الله
حملت الزهره بين اصابعها .. لم تعد ساقاها تستطيع حملها علي السير .. بل جرت ..

جرت وقد فقدت الخوف .. محوته من ذاكرتها مؤقتا

فمن الممكن يا فتاتي ان يأتي النور آخر الطريق .. فقط ثقي بالله
يا الله حين تقترب مني نجمات السماء .. لا تبعدها عني ثانيه
وان احسست بوجودك الي قربي .. لا تحرمني من هذا الشعور ..
فلكم تمنيت ان المس النجوم وانت معي ..

لما بتكلم عن الاحلام ..!

لما بنتكلم ع الاحلام .. علي طول نقول كلام في كلام ..وهو احيانا بيكون كلام .. واحيان بيكون هذيان ..

.. ، لما جيت وحكيت .. عن كلمه واتمنيت ..... تتقالي في يوم من الايام .. كت شفت في منامي ان الحقيقه بتكون احلام .. وبتتحول لكلام .. فــ واقع .. وايام ..

يعني الاحلام .. مش مجرد كلام في كلام .. والا انا اللي افكاري بقت جنان .. ?

وايه يعني لما تكون جنان .. ماياما مجانين طلعوا للقمر.. ويا ما كتير صنعوا معجزات .. وكانت في الاصل شويه جنان ..

.. يا مجانين اوعوا تعقلوا .. دي الدنيا عايزه احلام الجنان .. !

ولو تعبت في يوم .. وحسيت انها مش امان .. ماتخافش .. غمض عيونك وشوف في المنام .. اللي نفسك تحس بيه مع الايام ..

هتلاقي احلي واجمل الاحلام .. مليانه من الجنان ايام وايام .. وتعيش معاها دنيا امان .. امان بجد مش خيالات ..

ماتستغربش .. دا حتي الخيالات اعقل من الجنان ..واهي احلامك تقدر تصحي منها ..يبقي يعني مش هينفع من الواقع ننام ...!

مغص في مشاعره !!

( مغص في مشاعره )

كل بنيادم طبيعي بيمر بمرحله بيجيله فيها مغص في مشاعره
ودا طبيعي .. بيكون نتيجه صدمات قديمه او التفكير الزياده عن حده في المستقبل
واكبر سبب لمغص المشاعر هو الاختيار الغلط !!

طبعا كلنا مرينا بالمرحله دي وياما هنمر بيها لسه لحد مانلاقي الشخص المناسب
لكن دورت انا بقا وسألت كتير عن اي مسكن للمغص دا لحد ما نلاقي اللي بندور عليه .. ملقيتش :(

واكتشفت كمان ان الموضوع ممكن يتطور ويجيب صداع مزمن في الدماغ وعلاجه صعب جدا جدا .. لانه بيني وبينكم .. ( بيجيب تخلف عقلي بمرور الوقت ! )

المهم ..
خلينا في المغص
غير انه متعب وبينكد علينا ويخلينا مش عارفين نفكر في اي حاجه مهمه .. الا اننا لازم نمر بيه .. علشان نعرف الفرق ما بين المضر وبيجيب مغص .. واللي سهل الهضم ولذيذ ..

في واحده هي اللي اثارت الجنان عندي الليلادي وفكرتني بالمغص ..
واحده بنوته يعني عندها ( 17 ) سنه .. جالها المغص دا 6 مرات .. = )
هي بتقول كدا ( 6 ) مرات .. مرّت فيهم بــ ( 6 ) تجارب فاشله .. وخلال 17 سنه .. يعني اول مره حبت كانت في كي جي ..
17 سنه دي علي ايامي تقريبا كانت ثانويه عامه .. فهي كانت بتذاكر ولا بتعد المرات !
وعلي كدا علي العشرين هتكون في العنايه المركزه !

انا ماعرفش يعني الناس بتعمل في نفسها كدا ليه
ليه ندخل نفسنا في تجارب فاشله واكيد بيبقي باين ولو بسيط انها هتفشل .. مش كفايا علينا اللي مش بنبقي عارفين وبناخد علي دماغنا فيهم !!
اظن كفايا .. لان بطننا مش هتستحمل كل شويه كدا .. المسكنات مبقتش بتعمل مفعول ..
حرام عليكوا صحتكم يعني .. :(


وانا سألتلي كام دكتور مغص .. يعني علشان ابقي ايجابيه بردو .. قاللي ان الحل هو انك تتجاهليه .. كأن معندكيش مغص اصلا ..
قلتله " ينفع يا دكتور " .. قال " اه .. لان المخ احيانا بياخد علي الفكره اللي بتوصليهاله .. لو وصلتيله انك تعبانه هتحسي بالالم .. لو وصلتيله انك نسيتي هيسمع كلامك " وهتخفي :)

فانا هجرب اعمل نفسي مش حاسه .. ونشوف بكرا هيحصل ايه .. ماهو مش كل حاجه تستاهل نستحمل علشانها المغص :)
شفانا الله وشفاكم
:)

الشعب يريد مخ جديد

من وجهه نظري المفقوعه من اللي حاصل .. الي القاريء اللي مش هيكون سعيد بكلامي
تحيه مش طيبه .. :(

طبعا كلنا شايفين مدي الغباء المتحكم في عقول المصريين .. او بعض المصريين علشان محدش يزعل
ودا حقيقي .. مازال بردو ناس حقيقي بتفهم !
من فتنه طائفيه لخلافات سلفيه .. واختلاف واسع جداا في وجهات النظر السياسيه
كوكتيل جميل اوي كلنا غرقانين فيه ويا عالم هنطلع منه ولا هيحصل ايه ؟؟
انا بصراحه قرفت من الكوكتيل دا مش عاجبني .. طعمه وحش ..
ايام مبارك اللي هي ايام الظلم والقهر .. كنا بنحب بعض عن كدا .. وبنحترم بعض عن كدا .. ومكنش في لا فتنه ولا اختتلاف
ع الاقل كلنا كنا متفقين علي حاجه واحده وهي ان نظام الحكومه ظالم .. ( كنا متفقين )
واتفاقنا دا وصلنا لاننا عملنا ما يسمي بـــ الثوره ..
ودا اللي ادي للي احنا فيه دلوقتي .. وهو ان مبارك ونظامه مشي من عندنا .. ساب الحكم .. الف مبروك

كل واحد يسأل نفسه بقا سؤال كدا
هل دا اللي احنا عايزينه
يعني ان مبارك ونظيف والعادلي وغيرهم يسيبوا الحكومه والحكم ؟
ولا كان هدفنا اكبر من كدا بكتير

ايون
كان هدفنا اكبر من كدا بكتير
وهي ان مصر تتغير
طب مصر ازاي هتتغير ؟
هقولك
يعني الناس ترجع تتفق تاني .. بس مش علي اسقاط النظام .. محتاجه تتفق ازاي هنبني نظام ..
بمعني
انا وانت وهي .. مسلم ومسيحي .. سلفي وصوفي وهندي .. صغير وكبير .. بتوع التحرير واللي مش طايقينهم .. كلنـــــــــــا .. نتفق علي حاجه واحده ونعمل ثوره
بس المره دي علي نفسنا
نعمل ثوره علي الغباء
بلاش نمشي ورا كلام حد .. سواء تابع لحزب او مؤسسه او اعلام .. خلينا نمشي ورا دماغنا
نفكر يعني =)
قبل ما تعمل اي حاجه فكر .. هل هي في مصلحتك ومصلحه غيرك ومصلحه بلدك .. ولا طلب صغير منك ممكن يحرق حي او بلد ؟؟
نفكر شويه لو سمحتم ؟؟
وانا مش هتكلم عن واقعه ولا عن حد معين
انا بتكلم عموما .. الناس فعلا مش بتفكر .. بتزيط في الزيطه .. غلط كدا والله
مصر ماتستاهلش مننا كدا
مصر تستاهل نفكرلها .. ونخططلها ونبنيلها من جديد .. مصر محتاجه مخ جديد علشان نقدر نعمل جديد ونتغير بجد

انا بنادي وبأعلي صوتي .. وبقول
الشعب .. يريد .. مخ .. جديد ..
الشعب .. يريد .. مخ .. جديد ..
الشعب .. يريد .. مخ .. جديد ..

خناقه علي صباع

خناقه علي صباع وصوّر يا معلم !

انا عرفت دلوقتي الحمد لله سبب انشاء موقع الفيس بوك :)
هما قرروا يعملوه علشان يطوروا موهبه التصوير عند المصريين .. ويبقي في عندنا جاليري كبير لاشهر سلبيات في العالم .. وعلشان نلاقي حاجه نتريق عليها =)

كان في خناقه علي صباع في الشارع
اتنين مصرّين يموتوا بعض .. واحد بيحدف واحد الطوب .. والتاني عايز يديله بشومه
والعربيات اللي في الشارع والناس والمحلات هي اللي كانت بتضّرب الحقيقه !

الناس مش بتحوش مش علشان ماتتعورش .. لأ .. علشان كل واحد كان مشغول يطلع موبايله .. ويصور ..
اكيد طبيعي .. ماهم شايفين كائنات غريبه بتتعامل مع بعض لازم تتصور !
ويروّح يلاقي حاجه يعملها ويوريها لاصحابه ويشيروها لبعض وهكذا .

دا بدل ماتحلها .. ولا تحوش بينهم لتيجي فيك انت شخصيا طوبه ترقدك ..
ايه السلبيه اللي الناس فيها دي
ولما انت نفسك مش قادر تتدخل تحمي نفسك وغيرك .. ليه بتزعل لو الشرطه مجتش .. ماهي السلبيه واحده !!

بصراحه .. الموقف دا عصبني جداا .. لاني كنت واقفه مرعوبه حاجه تيجي في حد مش طرف في الخناقه .. ولقيت مش واحد لا كتير بيطلّعوا موبايلات علشان يصوّروا .. واراهنك لو شفت حاجه زي دي بتحصل في اي بلد بره !

يعني هل هي هتقلب بجريمه ودا هيبقي دليل ؟ .. ولا دي هوايه عنده ؟ .. ولا فراغ ؟ .. ولا مثلا مثلا يعني بيفكر يعمل فيلم رعب ؟ .. مش فاهمه ايه السبب ؟

هي دي مصر الايجابيه اللي اتغيرت بعد الثوره ؟؟
هي دي مصر اللي احنا عايزينها ..؟
هو دا الشعب اللي المفروض يكون ايد واحده ؟؟

انا زعلانه وقلقانه علي بلدي !